Fatim-behivavy iray manodidina ny 40 taona eo no hitan’ny olona tany akaikin’ny fasam-bazaha, tany Antanimasaja Ambohimandamina, Mahajanga, ny asabotsy maraina teo. Novonoina tamin’ny fomba feno habibiana izy io. Notapahina roa ny vatany, ary natsipy tany anaty hantsana avy eo. Tonga teny an-toerana ny mpitandro filaminana sy ny dokotera nizaha ny razana. Mandeha ny fanadihadiana.

Taxi-be iray tapaka hisatra teny Andoharanofotsy omaly ka nandona bisikileta. Tery teo amin’ny vodirindrina ilay bisikileta fa mba afaka kosa ilay mpitondra azy. Na izany aza, naratra ihany ilay rangahy nitondra bisikileta. Difi-janahary no tsy nahafaty ilay rangahy. Ilay fiara kosa tsy nahetsika. Vokatry ny tsy fanaraha-maso ny olana ara-teknika alohan’ny hiasa ny anton’ny loza. Ny tranga toy izao no mety amoizana ain’olona maro.

Taolam-paty marobe no hitan’ny zandary tany amin’ny faritra Analanjirifo ny herinandro teo. Taolam-paty efa anjatony sarona tamin’izany. Taolan-dava avokoa ireo, izay tsy fantatra na saika hoentina aiza. Efa nisy sarona ny olona nitondra izany, mandeha kosa ny famotorana manodidina izay mety hilana ireo taolam-paty marobe.

Olona telo voasambotra noho ny fanaovana “visa” hosoka. Vehivavy iray 45 taona saika ho any La Réunion no tratra tamin’izany. Teratany kaomorianina roa lahy ihany koa sarona, izay mpanamboatra “visa” hosoka ihany koa. Vehivavy iray hafa 55 taona koa mbola voasambotra tamin’izany.

 Mitohy ny fanadihadiana mahakasika ireo teratany vahiny, ahina ho mpampiditra vola maloto eto Madagasikara sy manadio izany anatin’ny sehatra fandraharahana eo amin’ny harena an-kibon’ny tany sy ny fananganana fotodrafitrasa. Mbola mipetraka ny fikarohana ireo teratany armenianina fito mianadahy David Agadzhanov, Christian Fischele – Iuri Kozlov, ramatoa Irina Safronova, Leonov AlIeksej, Aleksej Poddubniy , Aleksej Skorkin, V. Druzhinin, Bernikov Uladzimir, Martinov Andrey.

Tsy vitan’izay, mbola voasaringotra anatin’ny raharaham-pitsarana momba ny fivadiham-pitokisana tamin’ny orinasa lehibe iray hafa ihany koa izy ireo. Ity farany, izay nahita faisana noho izany, satria na ireo mpiara-miombon’antoka aminy aza nampitsahatra ny famatsiam-bola sy ny fiaraha-miasa. Mahatsiaro ho voa mafy ity orinasa malagasy ity ankehitriny, ka manao antso avo amin’ny mpitandro filaminana mba hijery akaiky ny mahakasika ireto vahiny ireto. Eo koa ny fitarainana amin’ny mpitondra fanjakana mba ahafahan’ireo orinasa mpiahy azy hiverina eto an-toerana, toa ny Frontline Limited sy ny Sarl Rantekt.

Marihina fa mbola eo am-panaraha-maso ny kaonty iray, fampiasan’ny mpamotsy vola, izay any amin’ny tanànan’i Rigà, Saint-vincent et Grenadines ireo mpanao fanadihadiana. Ao amin’ny Abvl Bank, As 23 Elizabeth ity kaonty ity.

Ireo olona voatonona anarana ireo, dia efa manana antontan-taratasy maloto eny amin’ny fitsarana avokoa. Misy ny efa nahazo sazy, saingy afaka niala an’i Madagasikara ihany noho ny fanaovana hosoka amin’ny taratasy ahafahana nivoaka.

Yves S.

Nosamborin’ny zandary ny zoma hariva teo ny saofera iray teny Ambodivona noho ny fanompana sy fanevatevana mpitandro filaminana. Notanana ao Ankadilalana avy hatrany izy io, ary atolotra ny fampanoavana anio. Araka ny fanazavana, nanao ny asany fanaraha-maso ny taratasy ampiasain’ny mpitatitra sy mpamily ny zandary miasa eny Ambodivona eny. Misy sampana iray natokana hanao izany eny an-toerana, ary zandary ny tompon’andraikitra amin’izany. Saofera iray no lany “visite médicale” nandritra ny fanaraha-maso fanao. Nampanantsoina izy io ka nifamaly tamin’ny zandary tao an-toerana. Niafara tamin’ny fanompana mpitandro filaminana ny raharaha. Nanao tatitra tamin’ny lehibeny ireo zandary niasa ka nosamborina avy hatrany Ingahy mpamily ny zoma hariva io. Ny asabotsy, nisy andian’olona nitaky ny amoahana ilay mpamily, saingy nasaina namonjy teny Ankadilalana ireo. Nitondra mpisolovava noho izany ny avy amin’ny kaoperativa mba hiaro ilay mpamily. Ny fitsarana kosa no tompon’ny teny farany anio, momba ity saofera ity, izay enjehina noho ny fanevatevana sy fanompana mpitandro filaminana.

Yves S.

Voalazan’ny manodidina fa efa ho 15 lahy ireo jiolahy nanafika teny Ambolokandrina ny zoma hariva teo, nanodidina ny tamin’ny 7 ora.

Tsena telo nasesin’ny jiolahy nirongo basy sy sabatra ary antsy notafihana tamin’izany. Voaroba ny vola 4 tapitrisa Ar niampy izay entana zakan’ireo olon-dratsy. Tovolahy roa kosa naratra: ny iray ny mpanampy tao an-tsena, izay nikasa hanohitra, kanjo voan’ny antsy ny tanany; ny faharoa kosa, resevera iray nidina ny fiara nolalovan’ny bala, fa difi-janahary tsy nahavoa azy. Maromaro ihany koa ireo voaray tamin’ny vozon’akanjony norahonan’ireo jiolahy. Tao anatin’ny fotoana fohy nanaovan’ireto farany ny asa ratsiny. Tsy nisy nahetsika ny manodidina teo anoloan’izany.

Efa dify ireo jiolahy vao tonga ny polisy teny an-toerana. “Tsy tratran’ny polisy intsony ireo mpanafika. Misy paositry ny polisy ihany ety, saingy vitsy ny miasa ao aminy, ka mety tsy hahatohitra ireo jiolahy. Anisan’ny mety nahataraiky azy ireo izany”, hoy ny fanazavan’ny tompon’andraikitry ny fokontany eny an-toerana.

Anisan’ny nampitaraina ny mponina ny fahataran’ny polisy nandritra ny fanafihana. Faritra mafana eny an-toerana ary be olona mifanerasera. Milaza ny mponina fa misy ihany ny polisy tazana manao fisafoana, saingy tsy ampy izany, ka hararaotin’ny olon-dratsy. Tsy ny eny Ambolokandrina ihany anefa no manomboka mahamay amin’ny asan-jiolahy fa efa manerana ny renivohitra mihitsy. Tsy lazaina intsony ny faritra ivelan’Antananarivo.

Yves S.

Hodinihin’ireo depiote anio eny Tsimbazaza ny tolo-dalàna momba ny fananganana ny Vaomiera mahaleo tena misahana ny fifidianana (CEI), ny andraikiny sy ny hampandehanana azy. Efa mirona any amin’ny fanoloana ny Cenit izany izao ireo depiote raha miainga amin’io volavolan-dalàna io.

Maherin’ny 5 000 ireo antontan-taratasy filatsahan-kofidina ho kandidà ben’ny Tanàna voarain’ny Ovec rehetra manerana ny Nosy, hatry ny omaly.

Tsiahivina fa ho fantatra afaka 72 ora, taorian’ny fe-potoana farany nametrahana izany ny herinandro teo ireo kandidà ofisialy afaka hifaninana.

« Tsy manohana ny antoko HVM ny Tim. Amin’ny maha antoko mandray andraikitra azy eto Madagasikara, ary manam-pikasana ny hahasoa ny firenena: manohana sy manampy ary mandray anjara amin’izay hevitra hampandrosoana izy. »

Fanazavan’ny filoha nasionalin’ny Tim, Razoarimihaja Solofonantenaina, teny Faravohitra, afakomaly, io. « Ezahinay ampiana ny fitondrana, raha ohatra misy ny azo atao. Izay no nanomezanay olona ao anatin’ny governemanta », hoy izy.

Izay koa ny mahatonga ny Tim manolotra kandidà ho ben’ny Tanàna. Mba hahafahan-dry zareo manatanteraka ny vinam-piarahamonina tianay hapetraka eto Madagasikara miaraka amin’izay tsara sitrapo izany: fampandrosoana ny firenena.

Hanao kongresy ny antoko

« Hanatanterahana ny kongresy nasionalin’ny Tim eny amin’ny Tiko Tanjombato, ny 22 mey ho avy izao », hoy ny mpikamban’ny birao politikan’ny Tim, Rakotoarivelo Mamy. Hampisehoana io fa mifoha tamin’ny torimasony ny Tim, somary nangingina tsy nanaovana atsonjay nandritra ny Tetezamita. 10 000 ny mpandry anjara andrasana. Hanova birao nasionaly ny Tim amin’izany. Haseho amin’io avokoa ireo kandidà Tim amin’ny fifidianana ben’ny Tanàna.

« Izaho no mitondra fa tsy vadiko« , hoy Ravalomanana Lalao

« Mety misy hanontaniako ny vadiko eo amin’ny lafiny teknika, fa izaho ihany no mitondra. Manana ny nofinofiko hitondrana an’Antananarivo Renivohitra mba tiako ho tanteraka aho », hoy kosa Ravalomanana Lalao, namaly ny mpanao gazety. Maninona ny ben’ny Tanàna no tsy afa-kiara-miasa amin’ny mpitondra?

Aminy, adidy ny manarina an’Antananarivo Renivohitra mba ho firenena tsara laza i Madagasikara. Eo koa ireo fahasahiranam-bahoaka. Raha eo amin’ny mpifanandrina amin’ny fifidianana, tsy maninona rehefa mitondra fitiavana sy fanarenana.

Raha voafidy izy, hiara-kiasa amin’izay mazoto hanarina an’Antananarivo. Mety mifanohana ihany koa izy mivady. Matoa mirotsaka ho kandidà izy, izy no mitondra…

R.Nd.

 Ankoatra an’Antananarivo, anisan’ny hifantohan’ny sain’ny mpanara-baovao ny ho fizotry ny fifaninanana eo amin’ireo ho kandidà ben’ny Tanàna any amin’ny faritra. Hafana tanteraka ny fampielezan-kevitra.

Anisan’ny kandidà misongadina ao Toamasina ny ben’ny Tanàna teo aloha, Rakotomanana Gervais na i Lebaba, avy amin’ny Tim. Eo koa anefa ny avy amin’ny Mapar, amin’ny alalan-dRatsiraka Elysé. Manampy azy eo ny Praiminisitra teo aloha, Mangalaza Eugène natolotry ny tsy miankina. Kandidàn’ny HVM kosa i Zara Hassanaly…

Ho an’ny ao Fianarantsoa, mbola niverina ho kandidà ny PDS teo aloha, Rakotoniaina Pety avy amin’ny Tambatra. Ho mpifaninana aminy ny depiote Razanamahasoa Christine natolotry ny Mapar.

     Ho an’ny ao Antsirabe indray, miisa 12 ireo kandidà ka avy amin’ny antoko politika ny 7 raha tsy miankina kosa ny 5.

Anisan’ny mpifaninana amin’izany ny kandidà’ny HVM, Razafimahatratra Valisoa sy ny avy amin’ny Tim, Rabarijaona Andrianjatovo ary ny lehiben’ny faritra teo aloha, Razanakolona Paul. Manampy ireo ny avy amin’ny Arema sy ny MDM ary ny mahaleo tena.

Kandidà any Antsiranana ny PDS vao nesorina tamin’ny toerany, Houssen Alibay.

Kandidà ny Jly Camille Vital

Natolotry ny HVM any Mahajanga ny PDS teo aloha,  Solofomanga Heriniaina. Ramanantsoa José kosa ny kandidàn’ny Tim.

Ho an’ny any Ambatondrazaka indray, kandidàn’ny HVM ny Dr Saonina na Raminoarison Honoré.

     Fito ireo kandidà hifaninana any Toliara ka anisan’izany ny Praiminisitra teo aloha, ny Jly Camille Vital avy amin’ny Hiaraka isika. Eo koa ny kandida’ny HVM, Behaja Jean ary natolotry ny Tim kosa, avy amin’ny HVM

Tsiatenge Louis. Manampy ireo, samy nanolotra kandidà ny MTS sy ny Arema.

Synèse R. sy Jeannot Ratsimbazafy ary CMS.

 Kandidà atolotry ny Mapar eny amin’ny kaominina Alasora, Rabary Thierry. “Vonona ny tenanay hitondra ny fampandrosoana. Zanak’ity tanàna ity izahay ary mahalala ny olana sy hitondra vahaolana eto. Hijery manokana ny lafiny sosialin’ny mponina…”, hoy izy, tamin’ny fanaterany ny antontan-taratasy filatsahan-kofidiny ny faran’ny herinandro teo.

     Anisan’ireo kandidà misongadina tenany amin’ireo mpifaninana aminy eny an-toerana.

Tsy vaovao eo amin’ny fandraisana andraikitra ity kandidà ity. Efa nisahana andraikitra maro amin’ny fitantanana samihafa ny tenany nandritra ny 10 taona.
Tsy vitan’izany fa efa nilomano tao anatin’ny politika tanteraka koa ity kandidà ity.

Anisan’ireo kandidà solombavambahoaka farany teo teny Avaradrano Rabary Thierry.

Synèse R.

 Nankalazaina ny asabotsy teo teny Mandrosoa Ivato, ny faha-20 taon’ny Foibe Soltec. “2000 ireo mpiofana efa nandalo tato ka nahita asa ny 70% amin’ny orinasa maro samihafa. 50% kosa ireo efa mitantana sy manana asa mahaleo tena manokana. Anisan’ny raisinay eto ireo zanaky ny kamboty sy sahirana rehefa voamarina sy vita fanadihadiana”, hoy ny tompon’andraikitra, Rakotoarisoa Lantonomenjanahary.

Ahitana sampam-piofanana, toy ny mekanika ho an’ny fiara, ny zaitra sy ny fandroan-tsakafo, eo koa ny momba ny elekrisite, ny tontolon’ny rafitra hazo sy ny vy ny eo anivon’ny Soltec.

     Anisan’ny mampiavaka ny Soltec koa ny famokarany ny fitaovana mandeha amin’ny herin’ny masoandro. Maimaim-poana ny fanofanana. “Iarahana amin’ny fanjakana hatrany ny fandaharam-pianarana sy ny fanadinana… “, hoy ihany izy.

     Mpiara-miombona antoka ara-bola ny Soltec ny fikambanana DMW any Alemaina raha ny Avana Regenbogen kosa no miahy ara-tsosialy ireo mpianatra.

Tonga nanotrona izany lanonana izany ny masoivohon’i Alemaina miasa sy monina eto amintsika ary ireo mpiara-miombona antoka amin’ny fampandehanana ny Soltec.

Synèse R.

 Kandidà vehivavy anisan’ny misongadina. Natolotry ny Miaraka amin’ny prezida Andry Rajoelina (Mapar) hitondra ny fanevany eny Ankadikely Ilafy ho kandidà ben’ny Tanàna Rajaonah Mirana. “Vonona ny handray andraikitra izahay amin’izao firotsahako ho ben’ny Tanàna izao. Hijoro ho amin’ny fampandrosoana ity kaominina ity ary hampivoatra koa ny fiainan’ny mponina eto aminay”, hoy izy raha nametraka ny antontan-taratasy filatsahan-kofidiny teny amin’ny Ovec Nanisana ny faran’ny herinandro teo.

     Tsy mpanavao eo amin’ny fandraisana andraikitra noho ny traikefa ananany tamin’ireo dingana sy ny antanan-tohatra nolalovany eo amin’ny politika ny kandidà Rajaonah Mirana.

     Tsiahivina fa mpikambana eo anivon’ny TGV ny tenany manana andraikitra ao amin’ny Mapar.

Synèse R.

 «Toy ny tongo-bakivaky, sady maharary no mahamenatra». Izay no azo amehezana, ny nanjo, ny ekipam-pirenena malagasin’ny tae-kwon-do WTF, niatrika ny fiadiana ny ho tompondaka eran-tany, natao tany Rosia. Tsy ampy ny fampahafantarana nataon’ny federasiona, hany ka niteraka alahelo sy hatezerana, ho an’ireo atleta ny zava-nisy. Dimy no atleta voalaza fa hiaro ny voninahi-pirenena, saingy tamin’ny ora farany, tsy nisy afa-tsy iray sisa, niatrika izany. Voalaza fa tsy ampy vola ny federasiona ary tsy nahazo tamin’ny fitondrana ihany koa ka voatery najanona ny efatra. Ny olana, tsy mba nisy filazana an-gazety, ny tsy fahalasanan’izy ireo fa navela fotsiny tamin’izao. Etsy andaniny, efa voalahatra tao anatin’ny tabilao ny daty sy ny fotoana ary ny mpifanandrina, ho an’ireo mpikatroka tsirairay. Noho ny tsy fisian’ny fampahafantarana, nambaran’ny federasiona iraisam-pirenena fa “disqualifié” ny Malagasy. Ny “disqualification”, dia misy amin’ny haiady. Mety ho fihoaran’ny lanjan’ny mpikatroka na fahadisoana teknika eny ambony “tatami”. Tokony, ho anatra ho an’ny federasiona ny nanjo azy, ka hanisy lanjany ny serasera.

 Tompondaka

 Nampahafantatra ny fanohanany ny kandidàn’ny Iarivo mitambatra, Rafalimanana Hery, tetsy Antsakaviro, omaly ny Groupe Impact. “Resy lahatra amin’ny fandaharanasany amin’ny fametrahana ho ambony ny fitoniana politika sy ny hanovana ny fomba fanaovana politika izahay . Fa eo koa fanomezany vahana ny toekarena”, hoy ny filohan’ny G. Impact, Andriamanamisata Lala.

     Nohamafisin’ny kandidà Rafalimanana Hery kosa, fa misokatra sy midanadana ho an’ny rehetra ny varavarana ho amin’ny fanohanana azy. “Tsy natolotry ny HVM fa tohanany izahay ato amin’ny Iarivo mitambatra. Ahitana vovonana politika, toy ny TGV, tanora Tim, MTS ireo mpanohana. Resy lahatra amin’ny fandaharanasanay avokoa izy ireo”, hoy ihany izy.

   Tsiahivina fa ahitana mpandraharaha sy manampahaizana ary koa mpiasam-panjakana ambony ny G. Impact.”Anisan’ny mpanolo-kevitra ny mpitondra izahay amin’ireo tetikasa eo an-tananay”, hoy ihany ny filohany.

Synèse R.

 Ny ekipazin’ny klioba Asacm, nisy an’i Boom sy Berthin, nitondra ny fiara Mitsubishi Evo X, nandrombaka ny fandresena teo amin’ny “rallye Total”, nokarakarain’ny klioba FMMSAM. Dingana voalohany amin’ny fiadiana ny ho tompondakan’i Madagasikara. Tsy mbola niala teo amin’izy ireo izany ny fandresena efa azony, tamin’ny taon-dasa. “Nahafinaritra ny nanatanteraka iny dingana voalohany iny satria tena niady hatramin’ny farany ny fifaninanana. Ny fahaizana nitantana ny fotoana, angamba no tombony ho anay. Na izany aza, mafy be taminay ilay “ES 6”, tao Anorohoro, izay nirefy 29 km”, hoy i Berthin.

Ankoatra izay, nanambara ireo ekipazy ireo fa tsy afaka niatrika ny fiadiana ny ho tompondakan’i Afrika tamin’ity taom-pilalaovana 2015 ity, na dia efa niomana tamin’izany aza, satria niala tamin’ny ora farany, ny mpanohana azy. Vokatr’izay, tsy maintsy hiatrika ireo fifaninanana rehetra eto an-toerana i Boom sy Berthin, amin’ity.

Tsy niala lavitra i Zaza Maditra

 Anisan’ireo ekipazy tonga hatramin’ny farany i Mathieu. Laharana faharoa, nisy azy ary very 1 mn 12 s, taorian’i Boom sy Berthin, izy. Anisan’ny niady tanteraka, ny teo amin’ny laharana fahatelo sy fahefatra. 1 segondra fotsiny, nahazoan’i Freddy sy Yachine, niakatra ny lampihazo, nanoloana an’i Haja sy Carol, izay mpanamory “mixte”, tonga voalohany, tamin’ity “rallye Total” ity.

Fiara 21 tamin’ireo 36, nandray ny fiaingana ny zoma lasa teo, tonga hatramin’ny farany, tamin’ity dingana voalohany ity.

Dingana manaraka ho an’ny federasiona sport automobile Malagasy (FSAM), ny “rallye Dzama Event”, hotanterahina any Antsirabe, ny volana jona ho avy izao. Mandra-piandry izany, toy izao, ny filaharana ankapoben’ireo fiara dimy tonga voalohany.

Tompondaka

1-Boom –Berthin – (Asacm) – Mitsubishi Evo X – (1 ora 54 mn 47 s)

2-Mathieu – Tsiresy – (Asacm) – Mitsubishi Evo IX – (1 ora 55 mn 59 s)

3-Freddy – Yachine – (Ama/Asacm) – Isuzu – (2 ora 04 mn 28 s)

4-Haja D – Ca            rol – (TMF Rally/Ama) – Great Wall – (2 ora 04 mn 29 s)

5-Tina – Tsiory – (FMMMSAM) – Subaru Impreza – (2 ora 05 mn 55 s)

 Niverina eo am-pelatanan’ny 3FB indray ny anarana maha tompondakan’i Madagasikara, eo amin’ny taranja rugby. Resiny teo amin’ny famaranana, ny klioban’ny Cosfa, saingy tamin’ny isa tery dia tery.

Telo taona aty aoriana, ny 3FB indray no voahosotra ho tompondakan’i Madagasikara, ho an’ny taom-pilalaovana 2015, rehefa nandresy ny Cosfa, teo amin’ny famaranana, amin’ny “Gold Top 8 Mada”, taranja rugby. Lasany ihany koa ny 1.500.000 Ar. Fihaonana notanterahina tetsy amin’ny kianjaben’i Mahamasina, omaly alahady.

Tamin’ ny moka fohy, 19 noho 17, nandresen’ny ekipan’ny minisiteran’ny Fahasalamana ny Be Baoty, tamin’ity lalao ity. Fihaonana izay tsy dia namaly loatra ny hetahetan’ny mpijery tonga maro, tetsy Mahamasina. Somary nifampatahotra ny andaniny sy ny ankilany, ka tsy dia niseho loatra ny tena endri-dalaon’ny roa tonta. Na izany aza, nisy ihany ny baolina nentin-tanana iray izay vitan’ny miaramila, tamin’ny alalan’i Mael, teo amin’ny minitra faha18-n’ny fizaram-potoana voalohany.

Raha ny fizotran’ny fihaonana, nitarika an’isa ny miaramila, teo amin’ny 40 mn voalohany. 11 noho 9, nisarahan’ny roa tonta, tamin’izany. “Hors-jeu” voatsaran’i José avokoa ny baolina tafiditry ny 3FB.

Teo amin’ny fizaram-potoana faharoa, vao nanomboka nanindry ny 3FB ary niezaka nanosika ny “paquet d’avant”-n’ny Be Baoty, izay tsy nahatohitra an-dry Zo sy ry Tolotra ary ry Haja Be, mihitsy. Vokatr’izay, nanao fahadisoana goavana izy ireo, ka nahazoan’ny 3FB, “essai de pénalisation”, ka nampitsimbadika ny isa ho 16 noho 11. Mbola niampy “hors-jeu” iray voatsaran’i José ihany koa izany avy eo ka lasa 19 noho 11.

Nanenina i Gougou

Tsy nahakivy ny tafika anefa izany fa niezaka nanindry ihany izy ireo, ka nahatafiditra “hors jeu” roa i Gougou. Nifanakaiky ny isa teo satria lasa 19 noho 17. Niezaka nanindry hatrany ny Be Baoty, ary nisy mihitsy ny fotoana saika nahatsindriany baolina, saingy votsotra izany. Nahazo karatra mavo i Gougou, teo amin’ny 5 mn tsy hiravana, taorian’ny fahadisoany nataony tamin’i Rija.

Taorian’izay nefa, nisy ny “hors-jeu”, azon’ny miaramila. Voatery i Hery, nandaka azy, izay tsy nahatafiditra izany. Tra-panenenana mafy i Gougou satria raha teo izy, izay manana talenta amin’ny fandakana baolina, mety nivoaka ho mpandresy ny Cosfa. Amin’ny “Coupe du Président” indray izany no manarina. Voatendry ho mpilalao nahatafiditra baolina be indrindra i Lesabotsy, mpilalaon’ny IRC, izay nahazo 400.000 Ar. I Tiana avy amin’ny 3FB kosa, no mpilalao mendrika, izay nomena 600.000 Ar.

Hanomboka ny 7 jona izao, ny amboaran’ny Filoha ka lalao ampahefa-dalana avy hatrany. 3FB hifandona amin’ny Cheminot ary Cosfa hifampitana amin’ny TFMA. Ny FTM indray hidona amin’ny Savony ary IRC hikatroka amin’ny TFA. Ny 14 jona, ny manasa-dalana ary ny alahady 21 jona, ny famaranana.

 Tompondaka

 “Hoezahinay ho tsaratsara kokoa noho ireo andiany teo aloha ny Afrobasket U16 filles, izay horaisintsika amin’ity”. Io no nambaran’ny filohan’ny komity mpikarakara ny fiadiana ny tompondakan’i Afrika na Cocan, Rabenarivo Lionel. Fifaninanana hotanterahina eto Madagasikara, etsy amin’ny lapan’ny Fanatanjahantena Mahamasina, ny 10 – 19 jolay izao.

Raha ny fanazavan’ity filohan’ny Cocan ity ihany, efa tafajoro avokoa mantsy ireo rafitra na/sy kaomisiôna rehetra mandrafitra ny Cocan, amin’izao fotoana izao, ary efa mandray ny andraikitra tandrify azy tsirairay ireo kaomisiôna.

Ankoatra izay, hiroso amin’ny hetsika fanentanana, toy ny mahazatra, isaky ny mampiantrano “Afrobasket” izy ireo. Fanindiminy amin’ity taona ity mantsy i Madagasikara no voafidy hampiantrano io hetsika faratampony eo amin’ny basikety aty Afrika io. Araka izany, hiova kely ny “Afrobasket Tour” amin’ity. Lasa basikety ho an’olon-telo miaraka na ny 3×3 na koa antsoina hoe Fiba 33 ny hetsika fanentanana eny amin’ireo faritra maromaro eto an-drenivohitra.

Ankoatra izay, voalaza ihany koa fa firenena 12 no handray anjara hiady ny ho tompondakan’i Afrika amin’izany. Anisan’ireo firenena voasokajy avy hatrany tsy nandalo fifanintsanana i Madagasikara, amin’ny maha mpampiantrano azy, eo koa i Mali, tompondaka farany, sy Egypte, mitana ny laharana faharoa.

Tanjon’ny Cocan indray kosa ny hanome zavatra tsara ireo mpankafy basikety eto Madagasikara sy ireo firenena mpandray anjara ary ny Fiba Afrique, tompon’antoka amin’ny fiahiana ny basikety afrikanina.

 Miary Narindra

 Tsy misy mandeha amin’izay laoniny. Raha voalaza fa anisan’ny vaindohan-draharahan’ny minisiteran’ny Fanatanjahantena (MJS) ny fanomezana fiofanana manokana ireo atleta malagasy amin’ny alalan’ny “sports-études”, izay tanterahina etsy amin’ny ANS Ampefiloha, tsy mahatana ny teny nomeny akory ity departemanta iray ity.

Ankehitriny, velon-taraina ireo atleta voafantina miatrika izany. Tsy ampy ny fikarakarana azy ireo, ratsy ny sakafo, ny trano fitoerana tsizarizary. Tsy vitan’izay, fa sorena amin’ny minisitera ihany koa ireo mpampiofana, izay tsy mbola naharay ny karamany efa am-bolana maro, izay mitentina eo amin’ny 28,8 tapitrisa Ar. Natsangana ny fanatanjahantena ho an’ny rehetra tany Mahanoro, notokanana ny sekolim-panatanjahantena tany amin’ny Faritra. Tsy voafaritra mazava anefa ny tetibola hampandehanana izany rehetra izany. Ny trosa amin’ny “spotrs-études” aza tsy voaloa, mainka fa ny hampandehanana ireo voalaza eo ambony ireo. Manampy izany ny fanomanana ny Lalaon’ny Nosy 2015 (JIOI) atsy La Réunion.

Hatreto, tsy hita soritra mazava ny politikan’ny minisitera amin’ny tena fampandehanana ny fanatanjahantena eto Madagasikara.

 M.N.

 Tsy namokatra ny solontena malagasy, teo amin’ny fiadiana ny ho tompondaka eran-tany, amin’ny taranja Tae-kwon-do WTF, notanterahina tany Rosia. Resy teo amin’ny fihodinana voalohany, Andy Loic, teo amin’ny sokajy -63 kg.

Efa nampoizin’ny rehetra ny vokatry ny fiadiana ny ho tompondaka eran-tany, amin’ny taranja Tae-kwon-do, ho an’ny Malagasy. Fihaonana izay notanterahina tany Rosia. Nihintsana teo amin’ny dingana voalohany, Rasolofo Andy Loic, hany solontenam-pirenena, niatrika izany fihaonana izany, teo amin’ny sokajy – 63 kg.

Tsy naharesy an’ilay Frantsay, Stevens Barclais izy. Tamin’ny isa mazava 15 noho 3, no nisarahan’izy mirahalahy. Nanjakan’i Stevens ny adin’izy mirahalahy. Lojika satria ity mpifanandrina aminy dia mpikatroka ampy fihaonana iraisam-pirenena, raha tsy hilaza afa-tsy ny medaly volafotsy, tamin’ny “Open d’Allemagne”, ny taona 2013, ny nandrombahany ny medaly alimo, tany Israely, io taona io ihany ary ny medaly volamena, tany Etazonia, ny taona 2011. Tompondakan’i Frantsa intelo misesy ary efa nahazo ny medaly alimo, nandritra ny fiadiana ny ho tompondaka eran-tany, natao tany Meksika ny taona 2013.

Olana ho an’ny mpikatroka malagasy kosa, ny tsy fahampian’izay fihaonana iraisam-pirenena izay. Na izany na tsy izany, traikefa ho an’ny atleta ny fandraisana anjara amin’ny sehatra ambony toa izao.

Ankoatra izay, noho ny tsy fisian’ny vola sy ny tsy nahafahan’ny fanjakana nanampy, tsy nisy afa-tsy i Andy Loic, ihany no niatrika ity fiadiana ny ho tompondaka eran-tany ity. Mpikatroka dimy mianadahy anefa no voafantina tao anaty ekipam-pirenena. Noho izany, naneho ny alahelony, ireo mpikatroka hafa, tsy mba afaka nandeha tamin’ity fihaonana an-tampony ity. Anisan’ireny i Felana, izay tokony hiady teo amin’ny sokajy – 46 kg.

 Tompondaka

Niofana nandritra ny 10 andro tany Antsirabe ny mpanara-maso ny asa ao amin’ny Tahirim-pirenena misahana ny fiahina ara-tsosialy (Cnaps). « Tsy maintsy mahay ny lalàna ireo mpanara-maso ny asa eo ao amin’ny Cnaps », hoy Ramboarison Harisson, efa 40 taona niasana teo anivon’ny Tahirim-pirenena. Isan’ny nanofanany ny mpandray anjara ny karazana lalàna eto Madagasikara toy ny didim-panjakana, volavolan-dalàna, sy ny lalàna maro samihafa mifandraika amin’ny asan’ny Cnaps, toy ny lalàna lah- 68/023 ny 17 desambra 1968 mamaritra ny fisotroan-dronono, ohatra.

Takina amin’ny mpanara-maso ny asa koa ny fahalalana ara-psikolojia, satria mifanerasera amina karazana mpampiasa samihafa ny mpanara-maso ny asa rehefa midina ifotony izy ireo. Misy mantsy ny mpampiasa sasany tsy te handrotsaka ny latsakemboky ny mpiasany any amin’ny Cnaps ka manana fomba manafinafina. Fihetsika mandika tanteraka ny lalàna velona anefa izany.

Nahafantarana ny antsipiriany momba ny hetra

Noho izany, tokony hahalala ny fiteny sy ny fihetsiky ny olona hanaovany fanamarinana ny   ny mpanara-maso ny asa. Ilaina koa ny fiomanana ara-batana sy ara-moraly. Tanjona ny hanefan’ny mpampiasa rehetra ny latsakemboky ny mpiasa mba hahafahan’ireto farany migoka ny zony.

Tsy sambany ny fanofanana ny mpanara-maso ny asa toy izao, saingy nampiavaka azy ny fivoarany. Ho an-dRainiasy Serge Florent, lehiben’ny Tendron’ny Cnaps Maroantsetra, nahazoany antsipiriany momba ny hetra (Code Générale des Impôts 2015) ity fiofanana ity. Namarana tamin’ny fomba ofisialy ny fiofanana ny asabotsy lasa teo ny Filohan’ny filan-kevi-pitantanan’ny Cnaps, Raveloson Odon sy ireo mpikambana ao amin’ny toniam-pitantanana.

Njaka A.

 Tsy nofinofy. “Hampiakatra ny fahefa-mividy sy hampihena antsasany ny fahantran’ny Malagasy 22 tapitrisa ao anatin’ny indray andro monja izahay ary tsy nofinofy toy ny fampanantenana poakatin’ny mpanao politika izany”, hoy ny filohan’ny fikambanana “Fahefa-mividy izao no takin’ny Malagasy” (FMI Malagasy), omaly tamin’ny resaka nifanaovana taminy. Ho azy, tsy fampanantenana fa fepetra no aroso.

     Nambarany fa didim-panjakana telo fotsiny ihany no fepetra raisina ahatongavana amin’izany. “Foanana ny didim-panjakana momba ny “flottement” na MID (Marché interbancaire des devises) rangory fototry ny afo nampihena ny sandan’ny Ariary nahatonga fahantrana. Hapetraka ny fanakalozana vola vahiny amin’ny taha tsy miovaova (système de taux de change fixe) ary ny fahatelo, mampiakatra 100% ny sandan’ny Ariary miohatra amin’ny vola vahiny. Hampihena ny fahantrana ho antsasany ao anatin’ny indray andro io fepetra fahatelo farany io, satria io no hampidina ho antsasany ny vidin’entana rehetra ao anatin’ny 24 ora.”, hoy ihany izy. Nanteriny fa mety ho vita izany raha miova fo ny mpitondra, mandray ireo fepetra telo ireo.

     Notsiahiviny fa anisan’ny mahatonga ny fahantrana ny fitotongan’ny volantsika. Noraisiny ho ohatra ny hoe raha mihena 100% ny sandan’ny Ariary androany, hiakatra avo roa heny ny vidin’entana eny an-tsena rahampitso. Tsy misy fahotana mahafaty natao, nefa mihena antsasany ny fahefa-mividy. Raha mbola mihena 100% indray ny Ariary rahampitso, hiakatra avo roa heny indray ny vidin’entana afakampitso, ary hizara roa indray ny fahefa-mividy antsasany omaly, ka ampahefany no sisa tavela afakampitso… “Raha zaraina efatra ny vola miditra aminao, mbola afaka mandoa hofan-trano ve ianao? Mbola afaka misakafo toy ny androany ve ianao? Tsia ny valiny”, hoy ity mpahay toekarena ity.

   Etsy andaniny, nambarany fa tsy miolonolona isika raha foana ny MID satria tsy misy akony amin’ny fifanakalozana ara-barotra amin’ny any ivelany izany.

Synèse R.

 Ho an’ny taom-pianarana 2015-2016, hanomboka amin’ny 21 septambra izao ny fidiran’ny mpandraharahan-tsekoly. Any amin’ny faha-5-n’ny volana oktobra kosa no hiverina an-dakilasy ny mpianatra aorian’ny fialan-tsasatra lehibe izay mamarana iry taom-pianarana 2014-2015 ity. Tsiahivina fa hanomboka ny 17 jolay ho avy izao izany fialan-tsasatra lehibe izany.

Tapaka ny lalana etsy amin’ny fidinana Ambatonakanga efa hatramin’ny 14 mey teo. Haharitra 10 andro ny fahatapahan-dalana eny an-toerana raha ny fanazavan’ny kaominina. Vokatry ny fanamboarana ny « pavé » izay nikorontana ka tsy azo andehanan’ny fiara intsony no anton’ny fanamboarana. Nandritra ny ora-nikija, kaohin’ny riaka avokoa ny fasika nitazona izany vato izany ka nampikorontana azy. Tsy maintsy midina any Mahamasina na miakatra any Faravohitra izany ny lalan’ny fiara.

220 km ny refin’ny lalana eto Antananarivo. 122,5 km amin’ireo no efa andalam-pahapotehana avokoa. Ny 25 km kosa no tokony hamboarina maika. Noho ny tsy fahampian’ny vola enti-miasa anefa, 13 km ihany no tena laharam-pahamehana ka ny 60%-n’ny asa no efa vita ankehitriny.