Sambany ! Misy izao ny tsangambaton’ny fahalalahan’ny asan-gazety ao Antsirabe. Niantsorohan’ny Vondron’ny mpanao gazety ao Antsirabe (VMA) sy ireo mpiara-miombon’antoka aminy ny nananganana izany, ho fanamarihana ny andron’ny 3 mey, andro eran-tany ho an’ny fahalalahan’ny asan-gazety, izay notokanana ny alatsinainy 4 mey lasa teo.
Nomarihin’ny filohan’ny VMA, Andrianjafisolo Mamy fa taratry ny firaisankina sy fisiana mandrakizay io tsangambato io. Ho an’ireo solontenam-panjakana nandaha-teny, mpiara-miombon’antoka amin’izy ireo ny mpanao gazety, araka ny lahateny nifandimbiasan’ireo solontenam-panjakana.
Nanazava ilay fifaninanana momba ny fahaleovantena sy ny fiandrianam-pirenena ho an’ny mpanao gazety, nandritra io fotoana io ny filoha lefitry ny holafitry ny mpanao gazety, Didi Ratsimbazafy.
Zo. Ra.