Taorian’ny fahavitan’ny fanadihadiana lalina azy 27 mianadahy tao Toamasina, ka namindrana azy ireo maika be teto Antananarivo avy eo tany amin’ny fonjan’Ambatolampy, araka ny baikon’ny fiadidian’ny Repoblika, fantatra izao, araka ny loharanom-baovao, fa hotsaraina eo anivon’ny fitsarana ady heloka be vavan’Antananarivo ny zoma izao izy ireo, izay efa manana antontan-taratasin’ady. Raha ny fanazavan’ny tonia mpampanoa lalàn’ny fitsarana ambaratonga voalohany Toamasina tamin’ny fihaonany tamin’ny mpanao gazety, ny 12 janoary lasa teo, resaka fakana an-keriny, fihazonana olona an-keriny, fihazonana basy tsy nahazoana alalana, ary fanaovana fikambanan-jiolahy ny fanenjehana ireo rehetra tafiditra tamin’ity raharaha Arnaud sy Annie ity.
Ireo fito ambiny, izay ahitana an-dRatoa Honorine sy Sanimohy vadiny, ny vadin’i Lejo sy ny sakaizany ary ity Rtoa mpiandry ny tranony. I Lejo na Massaro vao tratra tany Farafangana kosa, mbola miandry ny fahavitan’ny antontan-taratasin’adin’izy ireo ny fiakarany fitsarana izao, araka ny angom-baovao hatrany. Fantatra izao fa manao fanadihadiana lalina eo anivon’ny fonjaben’i Toamasina, sy ny fitsarana ao Toamasina, mikasika ilay resaka « MOP » azon’i Lejo tamin’ny 11 jona 2013, nahatonga azy niasa teo anivon’ny fitsarana, ireo mpanao fanadihdiana avy eo anivon’ny polisy misahana ny heloka bevavan’Antananarivo.
Sajo