Notontosaina tao amin’ny fari-piadidiam-pampianaran’i Marovoay (Cisco), ny 4 – 7 septambra lasa teo, ny fifaninanana fanatanjahantena an-tsekoly, ho an’ny faritr’i Boeny. “Dilon’i Boeny”ny niantsoana izany. Ny “dilo” dia anarana atin-kazo “manary” na “palissandre”, izay sady mahery no ain’ny hazo, hoy ireo mpikarakara ny fihaonana, ka mba ho mafy tahaka ny “dilo” ireo mivoaka mpandresy amin’ity taona ity.
Raha teo amin’ny vokatra, nivoaka ho “Dilon’i Boeny”, teo amin’ny handball ny Cisco Mahajanga I ary Soalala kosa ny teo amin’ny baolina kitra. Notoloran’Atoa Christophe Samuel, talem-paritry ny fanabezam-pirenena, ao Boeny, amboara isan-karazany sy medaly volamena ary lelavola, niampy fanamiana, ireo mpandresy, hiatrehana ny fifaninam-pirenena any Antsiranana.
Araka ny fantatra, ny Cisco Namakia, ao amin’ny distrikan’i Mitsinjo, indray no handray ny fifaninanana fanatanjahantena an-tsekoly manaraka.
Tompondaka